सणासुदीच्या सीज़न ग्राहकांसाठी एक त्रासदायक बातमी समोर आली आहे. खरी गोष्ट अशी आहे की, विमानात वापरल्या जाणार्‍या एटीएफ इंधनाच्या किमतीत झालेल्या वाढीचा खर्च आता एअरलाइन्स कंपनी ग्राहकांवर सोपवणार आहे. या रविवारीच, ATF च्या किमती सुमारे ₹ 5,779/KL ने वाढवल्या गेल्या, त्यानंतर देशातील सर्वात मोठी एअरलाइन कंपनी इंडिगोने त्यांच्या फ्लाइट तिकिटांमध्ये इंधन शुल्क जोडले आहे. त्यामुळे सणासुदीच्या काळात प्रवाशांना तिकिटांच्या दरात २०० ते १००० रुपयांपर्यंत जादा शुल्क मोजावे लागणार आहे. इंडिगो आपल्या देशांतर्गत आणि आंतरराष्ट्रीय दोन्ही उड्डाण्यांवर हे इंधन शुल्क आकारत आहे. आणि हे इंधन शुल्क 6 ऑक्टोबरपासूनच लागू होईल.
एअरलाइन्सने सांगितले की, सलग तिसऱ्या महिन्यात एव्हिएशन टर्बाइन इंधन (ATF) च्या किमती वाढल्यानंतर, एअरलाईन्सला देशांतर्गत आणि आंतरराष्ट्रीय उड्डाण मार्गांवर इंधन शुल्क लावावे लागले आहे. या किमती आजपासून 6 ऑक्टोबर 2023 रोजी रात्री 00.01 वाजल्यापासून लागू होतील.
सार्वजनिक क्षेत्रातील पेट्रोलियम कंपन्यांनी 1 ऑक्टोबर रोजी जारी केलेल्या अधिसूचनेनुसार, एव्हिएशन टर्बाइन इंधन (ATF) ची किंमत 5,779.84 रुपये प्रति किलोलिटर किंवा 5.1 टक्के वाढवून 1,12,419.33 रुपयांवरून 1,18,199.17 रुपये करण्यात आली आहे. याआधीही 1 सप्टेंबर रोजी विमान इंधनाच्या किमतीत 14.1 टक्क्यांची सर्वात मोठी वाढ करण्यात आली होती. त्यावेळी एटीएफची किंमत प्रति किलोलिटर 13,911.07 रुपयांनी वाढली होती.
याआधी 1 ऑगस्ट रोजी विमान इंधनाच्या किमतीत 8.5 टक्के किंवा 7,728.38 रुपये प्रति किलोलीटरने वाढ करण्यात आली होती. विशेष म्हणजे विमान इंधनाच्या किमतीत ही सलग चौथी वाढ आहे. एटीएफचा एअरलाइनच्या ऑपरेटिंग खर्चाच्या 40 टक्के वाटा असतो. 1 जुलै रोजी एटीएफच्या किमती 1.65 टक्के किंवा 1,476.79 रुपये प्रति किलोलिटरने वाढल्या होत्या. जेट इंधनाच्या दरात चार वेळा प्रति किलोलिटर २९,३९१.०८ रुपयांनी विक्रमी वाढ झाली आहे. गेल्या चार महिन्यांपासून ही दरवाढ सुरू आहे.
